Обуката ќе се реализира со физичко присуство

Институт КОНЦЕПТ, Скопје

ЦЕЛИ НА ОБУКАТА

Со учеството во оваа обука, на претставниците од деловниот сектор, компаниите во приватна и во државна сопственост, стопанските комори и слични здруженија,  ќе им биде овозможено да се стекнат со нови знаења, со тоа што во детали, прецизно и јасно ќе бидат запознаени со најновите предлог измени на Законот за трговските друштва, пред истите да стапат на сила и да почнат да се применуваат.

Ексклузивна и многу корисна е можноста за сите лица кои заземаат раководни позиции во компаниите, да присуствуваат на оваа професионална обука и да научат сè за принудниот откуп на акции од доминантниот акционер и правото за принудна продажба на акции од малцинските акционери. Се препорачува во оваа обука да се вклучат, правници, адвокати, финансиски експерти, ревизори, проценители и консултанти кои би биле ангажирани од засегнати компании или сопственици на акции и да ги знаат правата, обврските и одговорностите при принудниот откуп и продажба на акции што со овие законски измени за прв пат се воведуваат во нашиот правен систем.

Затоа, со цел детално да се разгледа едно од најважните прашања за функционирањето на акционерските друштва, од аспект на заокружување на сопственичката структура обукта ќе започне со разјаснување на правната природа на оваа постапка на ткн. “истиснување” и нејзината практична примена. Предавачите ќе ja објаснат суштината на принудното купување и на правото на принудната продажба на акции, регулацијата, постапката за нивно спроведување со развивање фер процеси на вреднување на цената на акциите и гарантиран рамноправен третман на акционерите.

Законското нормирање на холдингот, односно концернот и уредување на прашањата кои се однесуваат за неговото функционирање, а особено даночниот третман за овие субјекти, може значително да придонесе за поедноставување и подобрување на примената на постојните законски одредби со кои е регулиран начинот на функционирање на овие форми на поврзување меѓу капиталните трговски друштва, значително подобрување на деловните резултати кај овие субјекти, како и унапредување на нивното работење во земјата, што ќе обезбеди понатамошен економски раст и унапредување на економскиот систем.

Воедно, донесувањето на законот има за цел доследна примена на политиките за спречување корупција и судирот на интереси, преку обезбедување интегритет и транспарентност при спроведување на постапките за избор и отповикување членови на органот на управување и надзорниот одбор во акционерските друштва и друштвата со ограничена одговорност во целосна и во доминантна сопственост на државата, базирано на систем на вредности и критериуми за квалитет. Се предлага воспоставање мерит процедура при именување членови на управни и надзорни одбори во овие друштва, како и регулирање на постапка во случаи кога има повеќе кандидати за едно место. Се предлага оптимизирање на бројот на членови во надзорни и управни одбори и се воведуваат критериуми за вид на образование и компетенции при именување членови на управните и надзорните одбори.